俗语话，礼多人不怪。广州就有一本市民礼仪手册，到今年已经发行整整十年。呢本手册，帮唔少初来步到嘅新广州人上咗一堂“礼仪课”。
广州人衣食住行嘅礼数样样都有讲究，想真正融入本地人嘅生活，做足礼数真系好重要。
除咗呢本手册啲野，仲有很多生活礼仪需要了解。好似话斟茶要斟七八分满咁，呢类礼仪各地都有。因为大家都知“茶半敬人，酒半欺人”，所以敬茶敬酒时都特别留心。而广州嘅细路仔，餐台礼仪就系从细个开始耳濡目染：食饭夹餸唔可以“飞象过河”；埋台食饭手踭唔好枕落张台，“离台三尺为斯文”；食饭唔好敲碗敲兜……呢一类嘅餐台礼仪，学唔识就会俾人笑“冇家教”喇。
除咗行为方面嘅礼仪，语言礼仪都好紧要。同台食饭，见到隔离嗰位停筷剔牙，呢个时候千祈唔好问“你食完啦”。可能后生仔唔为意，但系老人家就好忌：“咩叫食完？我仲有好多年饭要食！”虽然你未必系坏心，但系乱讲嘢都会得罪人。酒足饭饱之后，亦都唔好讲“好饱啊”“饱死喇”之类嘅话，因为老一辈嘅人认为“呻饥莫呻饱”，成日“呻饱”以后就会“食唔饱”。
其实，广州人礼数多唔代表我哋“难服侍”，啱啱相反，讲礼仪系对本土文化嘅尊重。无论过几多年，呢啲礼数都依然有用。
◎李月婷 媒体人
